|
|
|
|
NOVITADS DALLA CLAUSTRA DA GLION
|
|
|
|
|
|
|
|
BASELGIA CLAUSTRALA
|
Gia daditg eis ella vegnida tematisada: L’installaziun digl aultplidader en nossa baselgia. Nus essan sedecididas per in‘installaziun tut nova. Il buordi dils considerabels cuosts essan nus vegnidas da purtar damai che treis organisaziuns ecclesiasticas ed ina donatura anonima ein segidadas fermamein cun nus. Quei vegn buca mo dabien a nus soras ed als hosps en nos survetschs divins, mobein a tuts e tuttas che visetan nossa baselgia d’architectura moderna per concerts ni autras purschidas.
|
|
|
CULTURA DA PASCH- ILANZER SOMMER - STÄDTLIFEST
|
Il forum per la cultura da pasch s’engascha per ina cultura activa e vivida per la pasch en Svizra. El organisescha per la tiarza ga igl Ilanzer Sommer cun occurrenzas en nossa claustra, el marcau da Glion ed el contuorn. L’iniziativa per fundar quei forum ei vegnida da nus soras dominicanas. Gest avon igl “Ilanzer Sommer” ha igl eveniment dalla fiasta tradiziunala da Glion Städtlifest liug, numnadamein ils 4 e 5 d’uost. Il forum per la cultura da pasch vegn era ad esser presents leu cun in stan per presentar l’occurrenza “Ilanzer Sommer”, che ha liug ils 9 entochen ils 13 d’uost. Sco entschatta pigl “Ilanzer Sommer” menein nus atras ils 9 d’uost la sisavla conferenza per la pasch – 175 onns pasch en Svizra.
|
|
|
BAGHEGIAR IL FUTUR
Da temps en temps retenin nus nies pass per dar in’egliada viers il futur. Nus fagein quei cun in „egl d’ordvart“, quei vul dir: sut l’egida d’ina persuna cumpetenta “baghegein“ nus vida nies proxim futur. Ei va cheu buca sulettamein per l’organisaziun e planisaziun da finanzas, mobein era per valurs indispensablas per nossa veta en ina cuminonza cun ina media da vegliadetgna fetg aulta. Co creein e vivin nus nossa spiritualitad, sche nus reflectein e vegnin anavos tier nusezzas? Quellas ponderaziuns ein impurtontas e vegnan tematisadas a caschun da nies capetel uonn il november.
|
|
|
DOMINIKUS (SOGN DUMENI) - ROSA DALLA PAZIENZIA
|
In cultivader ed alevatur da rosas ha tratg avon entgins onns ina rosa speciala ed ha numnau ella tenor il fundatur da nies uorden “Dominikus.” El ha schenghegiau a nus soras da Glion in roser, il qual ei sesviluppaus dapi lu oreiframein en nies curtgin dalla claustra.
|
|
Ei dat in vegl himni latin da glorificaziun, che presenta a nus en vivs maletgs igl esser da sogn Dumeni. En quei himni vegn el numnaus “rosa dalla pazienzia.
|
|
Ils 8 d’uost festivein nus il di da commemoraziun dil fundatur da nies uorden, sogn Dumeni, e nus vegnin a cantar per siu di da fiasta – en sia honur e supplicond per nus el present - O ROSA PATIENTIAE, ti rosa dalla pazienzia.
|
|
|
Quella cuorta survesta davart nos plans, nies dafar e laschar, muossa a Vus: Nus essan en moviment. Semover sa esser stentus. Tonpli rughein nus il fundatur da nies uorden a caschun da siu di da fiasta, ils 8 d’uost , per il dun dalla pazienzia, cun nusezzas e cun auters.
|
|
Quei giavischein nus era a Vus.
|
|
|
|
|
|
Priura generala dallas Dominicanas da Glion
|
|
|
|
|
|
|
