NOVITADS DALLA CLAUSTRA DA GLION
|
|
|
|
|
|
|
|
ELLAS MIRAN ANAVON
|
El capetel general digl october 2022 vein nus elegiu il team che tgamuna nies uorden pils proxims sis onns.: Sr. Annemarie Müller (priura generala), sr. Monika Hüppi, sr. Brigitte Hobi (niev) e sr. Maria José de Sousa Brito. Ellas vegnan a procurar che las decisiuns ed ils resuns dil capetel general vegnien realisai, secapescha adina sustenidas entras la cuminonza dallas soras.
|
|
|
DRIZZAR DA NIEV LAS UNTGIDAS
|
En tgei direcziun dueien las untgidas dalla claustra vegnir drizzadas? En in uorden claustral sto quei vegnir discutau. Quei succeda oravontut duront in capetel general, sco quel che ha giu liug igl october 2022: 23 soras ein sefatschentadas duront diesch dis cun damondas digl avegnir. Las tscharnas per la selecziun da novas direcziuns ein ligiontas pils proxims treis onns. Tenor il tema dil capetel vein nus vuliu arver il spazi da nossa tenda e drizzar da niev las untgidas.
|
|
|
TONSCHAN ILS DANERS?
|
All'entschatta dil capetel general stattan ils quens da gestiun dils davos treis onns per scarica. Vein nus manischau aschia ch'ei tonscha per las expensas dil mintgadi per nus soras? Il medem mument sto vegnir manischau aschia, che las finanzas tonschan per che l'incumbensa dalla cuminonza dalla claustra (sco per exempel la Casa da sentupada) sappi vegnir finanziada, ch’ei sappi vegnir cuntinuau cun projects currents e ch’il manteniment dallas immobiglias sappi vegnir curclaus: Las untgidas per quei intent ein drizzadas vinavon viers igl avegnir.
|
|
|
70 ONNS PRESENZA EN BRASILIA
|
Igl onn1952 ein treis soras da Glion viagiadas en Brasilia. Ellas han accumpignau famiglias purilas tudestgas, che vevan piars lur basa d’existenza da viver entras la Secunda Uiara mundiala. Cura che quella nova entschatta era semanifestada, ein las soras sedrizzadas cun lur incumbensas viers la populaziun brasiliana. Oz schai la responsabladad per lavur sociala e pastoraziun els mauns da consoras brasilianas.
|
|
La pli gronda honoraziun per il 70avel giubileum han ellas astgau retscheiver a caschun dad in survetsch divin el pli renomau liug da pelegrinadi dalla Brasila, a Aparecida do Norte. La celebraziun ei vegnida emessa publicamein.
|
Atras tut quels onns ha nossa procura procura dallas missiuns susteniu da Glion anora igl engaschi dallas soras en lur projects per dunnas, affons e giuvenils e quei entochen il di dad oz.
|
E NUS SORAS A GLION?
|
El decuors da 12 meins, da november entochen november, vein nus stuiu purtar alla fossa diesch soras. Mintga cumiau fa vegnir nus pensivas e dat a nus igl impuls da dar in'egliada realistica sigl avegnir da nossa claustra.
|
|
|
|
Nus vein buc enta maun tut, denton enqual caussa bein. Il principal ei ina tenuta aviarta dad ina e scadina sora, cu ei va per midadas, che san vegnir encunter a nus il di da damaun sco era ils proxims onns.
|
|
Nus vein discurriu da noss'incumbensa dalla missiun. Aschiditg che nus vivin resta noss'incumbensa dad esser cheu pils concarstgauns en vigur. Quei savein nus mo contonscher entras nossa hospitalitad ed entras haver in'ureglia aviarta a caschun da sentupadas spontanas.
|
|
Concarstgauns interessai beneventein nus bugen en nossa baselgia per mussar ad els la bellezia dallas finiastras baselgia e la gronda forza expressiva che quellas han. Nus sespruein da celebrar la liturgia en ina fuorma equilibrada e contemporana. La baselgia dalla claustra duei esser in liug da sentupada cun Diu, independentamein dil fatg, che nus vegnin adina pli veglias ed independentamein dall'instituziun baselgia el status da crisa. Quei astga buca impedir nus da viver cunscientamein cun la forza infinita ed il messadi digl evangeli.
|
|
|
Aschia mein nus encunter a Nadal, ch'ei capitaus a moda tut nunspectaculara avon dus millenis. Aunc adina tschenta la fiasta a nus la damonda suenter la colligiaziun denter tschiel e tiara e la infiltraziun vicendeivla dil divin e dil human.
|
Jeu giavischel a Vus in benediu temps viers Nadal ed era vinavon.
|
|
