|
|
|
|
Novitads dalla Claustra da Glion
|
|
|
|
|
|
|
|
|
|
|
|
Cultura da pasch ella cuminonza
Igl onn 2021 s’enclina viers la fin. Nus soras essan seregurdadas dalla mort da nies fundatur digl uorden avon 800 onns cul motto digl onn “A meisa cun sogn Dumeni”.
|
Nossa tesa pil 2022 senumna: Cultura da pasch ella cuminonza
|
|
Inspiradas per quella tesa essan nus vegnidas entras il Forum per cultura da pasch ch’ei vegnius creaus da niev per il «Ilanzer Sommer», che ha giu liug igl uost l’emprema ga en nossa Casa da Sentupada.
|
|
Igl ei sempel da s’engaschar tut persuls per la pasch sil mund. Bia pli grev eis ei da salvar la pasch el ravugl familiar, en ina cuminonza ni en ina societad dinamica.
|
Leu vala ei da schar dar enqual caussa, d’exercitar il tedlar, l’entelgientscha e da tgirar il dialog, per saver ir pass per pass el futur cun quels, che partan nies mintgadi.
|
|
Pil schaner 2022 planisein nus in’unitad da lavur el ravugl da nus soras, per reflectar quellas tematicas.
|
Indispensabla en tut nies far ei l’oraziun per nus cul patratg viers il fundatur da nies uorden, sogn Dumeni, ch’era in um dalla pasch.
|
|
In’oraziun, formulada dad in commember digl uorden, anfleis Vus cheu.
|
|
|
|
Mintg’onn vegn ei stad a Glion. Denton uonn eis ella stada particulara per nus.
|
|
Gia il 2020 ei il Forum für Friedenskultur vegnius fundaus. Il forum ha per finamira, da menar atras mintg’onn l’occurrenza «Ilanzer Sommer», in project che stat diltuttafatg ell’enzenna dalla pasch. Duront in’entir‘jamna.
|
Nus astgein mirar anavos sin dis beingartegiai. La casa da Sentupada ei s’emplenida cun carstgauns, che s’engaschan en ina fuorma ni l’autra per la pasch, seigi quei en regiuns da crisa, en lur patria ni era sin palancau politic. Tier quei project vein nus astgau collaborar cun instituziuns dil marcau da Glion: Museum Regiunal, Cinema Sil Plaz e l’administraziun Ilanz/Glion. Era la regenza cantunala ha demussau interess. Plein confidonza entscheiva la planisaziun pil proxim «Ilanzer Sommer» dils 7 - 13 d’uost 2022. Ina revista dil program vargau anfleis Vus sut www.ilanzersommer.ch
|
|
Il capetel dil november 2021
|
|
Sut in capetel claustral capin nus las reuniuns regularas enteifer la cuminonza. Silla gliesta da tractandas stattan damondas dil mintgadi, la planisaziun da pass necessaris pil futur e dabia auter.
|
El capetel dad uonn vein nus tractau plitost damondas davart nies futur en vesta a nossa cuminonza, che vegn pli e pli attempada, l’oraziun e liturgia sco era l’organisaziun el mintgadi dalla claustra.
|
Reorganisaziun dil cussegl general
|
|
Sin fundament dalla pandemia da corona vein nus refiers il capetel general 2021 per in onn sigl atun 2022. Ei vegn ad esser in capetel cun elecziuns.
|
|
Duas cusseglieras generalas, sr. Armina Maissen e sr. Maria Esther Küttel ein sedecididas suenter madira ponderaziun, suenter sis onns, pia gia quest’atun, da seretrer dil cussegl general.
|
|
Il cussegl general ha clamau las suandontas duas soras el cussegl:
|
|
Sr. Eugenia Jörger, medemamein ella funcziun sco secretaria generala
|
|
Sr. Maria José de Sousa Brito, Brasilia
|
|
Nus engraziein allas soras partentas per lur engaschi e beneventein las novas commembras el cussegl general.
|
|
|
|
Renovaziun dalla fatschada dalla baselgia
|
|
Sche Vus veis dau in sguard silla fotografia sura dalla baselgia claustrala croda forsa il schuber alv si. La baselgia ei vegnida concecrada il 1970. Suenter schi biars onns era il temps arrivaus per ina renovaziun dalla fatschada. Nus essan engrazieivlas, che instituziuns ecclesiasticas sco era autras han susteniu nus finanzialmein tier quei project.
|
Il november ha la pandemia contonschiu nus. Quei ha impediu fetg ils process dil mintgadi. Suenter che nus vein astgau selegrar duront la stad da saver esser pli libras, vein nus ussa puspei stuiu introducir mesiras fetg severas. Il contact cun la populaziun ei deplorablamein era fetg restrinschius. Grazia alla virola ein ils simtoms dalla malsogna stai migeivels tier las biaras soras.
|
|
|
Nies pursepen da Nadal - sill'emprema dumengia d'Advent
|
|
Il pursepen da Nadal, in’ovra da nossa consora defuncta, sr. Anita Derungs, vegn suenter in onn interrupziun puspei exponida ella baselgia claustrala.
|
|
Pervia dalla pandemia ein visetas spontanas senza annunzia buca pusseivlas.
|
Ei dat denton purschidas per visitar il pursepen. Dapli cheu.
|
|
Caras lecturas e cars lecturs
|
|
Probablamein vai cun Vus tuttina sco cun nus: Nus vein sperau sin in unviern senza pandemia. Tonpli engrazieivlas essan nus che la stad e cunzun igl atun aschi sulegliv ha regalau a nus in per bellezia dis.
|
Cun l’emprema dumengia d’Advent entscheiva – tenor veglia tradiziun – il niev onn ecclesiastic. Jeu giavischel a Vus, che Vus saveies prender temps per muments meditativs. Ei vala en mintga cass la peina da reflectar la muntada dalla naschientscha da Jesus arreguard l’atgna biografia ed en connex cun schabetgs actuals.
|
|
En quei senn giavischel jeu a Vus bialas fiastas da Nadal e bia confidonza egl onn vegnent 2022.
|
|
|
Sora Annemarie Müller
Piura generala dallas dominicanas da Glion
|
|
|
|
|
|
|
|
|
|
