|
|
|
|
Novitads dalla claustra da Glion
|
|
|
|
|
|
|
|
|
|
|
|
E LA FATSCHA DALLA TIARA DAVENTA NOVA
|
Pigl onn 2020 vevan nus soras previu da reflectar la refuorma e dad ughegiar refuorma, el senn da: refuorma scaffescha futur. Nossa cuminonza vegn pli e pli veglia, nus lein denton buca star culs mauns en crusch e spitgar sin quei che vegn aschidadir da sez viers nus. Nus essan sespruadas e sespruein aunc adina, da crear sezzas nies futur. Nus patertgein cheu buca mo vid il futur persunal da mintgina da nus. Sco cuminonza fagein nus era nos patratgs, tgei che savess esser nizeivel per las generaziuns vegnentas suenter nus – aschilunsch che quei selai enconuscher il mument actual. Adina puspei regala nossa liturgia a nus ina fetg biala antifona el decuors dad in onn – rugada sco cantada: TARMETTA ORA TIU SPÉRT E LA FATSCHA DALLA TIARA DAVENTA NOVA. In’oraziun dalla speronza e dalla fidonza en in Diu che lai la finala mai abandun sia carstgaunadad.
|
|
Ils tetgs plats da nossa claustra
|
Gia daditg han ei fatschentau nus en vesta ad in recav ecologic d’energia culla forza dil sulegl grischun. Ellas novitads dil mars d’uonn vein nus menziunau nos plans da schar installar indrezs fotovoltaics. Dapi il zercladur sepresentan quels sin ina surfatscha da 1000 meters quadrat e tuttina tut discretamein. CHEU intervegnis Vus dapli.
|
|
E sut nos tetgs: in project per la pasch
|
Dapi 2018 luvrein nus tut secret vid quei project. Treis persunas externas dil fatg han cumpignau nus cheutier. Ussa eisi aschi lunsch. Ils 13 da november havein nus fundau l’uniun ‘Forum für Friedenskultur’. La stad 2021 duess igl emprem forum haver liug en casa da sentupada. Igl impurtont sur quei project saveis Vus leger CHEU.
|
|
100 onns procura dallas missiuns a Glion
|
Ils 7 d’october 1920 ein las empremas siat soras da nossa cuminonza emigradas sco missiunaras ella China. Denter ellas era treis grischunas: Sr. Thomasa Monn e Sr. Carmelina Paly, omisduas da Cumpadials, e cun ellas Sr. Simonetta Brunner da Domat/Ems. Quei ei stau ina nundetg curaschusa, bunamein aventurusa partenza da dunnas giuvnas en ina tiara cumpleinamein nunenconuschenta ad ellas.In rapport extendiu cun maletgs impressiunonts anfleis Vus CHEU.
|
El decuors dad entgins onns ei s’etablida igl emprem ina pintga gruppa, lu ein pliras persunas interessadas vegnidas vitier – mira sut: Freundeskreis. Ins s’entaupa mintgamai ad ina tematica speciala. Dapresent stattan ils quater elements el center: aua, fiug, aria, tiara. Il settember ha ina sora preparau igl impuls tematic tiel tema tiara: FAGEI SUBDITA LA TIARA A VUSEZZI? – IL PAPA VESA VERD. Vus saveis leger il text CHEU.
|
|
Novas cuminonzas entscheivan el pign
|
Ina legreivla novitad en connex cun nies uorden ha contonschiu nus il settember. Ina nova cella dominicana sefuorma. La BREV da Turitg raquenta dapli surlunder.
|
|
In sguard sigl onn proxim 2021
|
Uonn, ils 7 da mars vessen nus vuliu festivar il 50avel giubileum dalla consecraziun da nossa baselgia claustrala. Pervia dalla pandemia vein nus stuiu annullar quei. Ussa sperein nus da saver prender suenter quei igl onn vegnent. Il termin ei aunc buca fixaus.
|
Il 2021 vegn ad esser pigl entir uorden da predicaturs in onn da giubileum. Avon 800 onns, igl onn 1221, ei il fundatur da nies uorden, sogn Dumeni, morts. La parola digl onn da giubileum secloma: A meisa cun sogn Dumeni. Tgei munta ei da seser a meisa cun sogn Dumeni sco cun in contemporan? Sur da quei vegnin nus a reflectar igl onn proxim.
|
Jeu giavischel a Vus in benediu temps d’advent.
|
|
|
|
Priura generala dallas soras dominicanas da Glion
|
|
|
|
|
|
|
|
|
|
|
|
|
|
