NOVITADS DALLA CLAUSTRA DA GLION
|
|
|
|
|
|
|
|
ARVA IL SPAZI DA TIA TENDA
|
Quella parola da nies capetel general digl october 2022 duei accumpignar nus atras igl entir onn 2023. Nus udin ella dil profet Jesaja (54,2). Per nus sco cuminonza da soras ei quei plaid in invit dad arver nossa tenda interna, dad arver adina puspei il horizont da nies patertgar per tut quei che muenta la carstgaunadad. Tgei vein nus da schar curdar? Tgei vein nus d’iniziar per nusezzas e per auters – per il futur?
|
|
|
NUS HAVEIN FETG BUGEN NOSSA BASELGIA CLAUSTRALA
|
Avon 53 onns ei nossa baselgia vegnida consecrada. Mintga di empleina l’oraziun communabla dallas soras il spazi da quei liug. Mo era il far diever da quella localitad sacrala ha priu tier a moda fetg vasta, per exempel per grondius concerts. Ussa eis ei temps da renovar totalmein igl indrez digl aultplidader; ina gronda sfida finanziala. Cun gronda engrazieivladad astgein nus retscheiver per quei project il sustegn d’organisaziuns sacralas e d’amitgs dalla claustra. Soras, sedestadei dalla sien e cantei! Aschia udin nus en "accordà", il magazin dalla Kammerphilharmonie Graubünden.
|
|
|
TAIWAN - L'INSLA FATSCHENTA NUS
|
Ei commuenta nus che dunnas cristianas taiwanesas han preparau il Di d'oraziun mundiala dallas dunnas. Pertgei actualmein vivan aunc otg da nossas consoras indigenas a Taiwan. Nus fagein quitaus per ellas per motivs politics: La republica dalla China smanatscha danovamein cun preschientscha militara da vuler annectar il Taiwan.
|
|
La sera dils 3 da mars celebrein nus en nossa baselgia claustrala il di d’oraziun mundiala ensemen cun las dunnas dallas duas pleivs da Glion, catolica e reformada.
|
|
|
ICONAS SIN CHISTAS DA MUNIZIUN - IN'EXPOSIZIUN
|
Entochen ils 26 da mars astgein nus presentar en nossa baselgia: Novas iconas ucrainas, screttas – aschia numn’ins quei correctamein – sut las impressiuns dall’uiara. Chistas da muniziun dalla front d’uiara, donnegiadas e vitas, han inspirau igl artist Oleksander Klymenko da far quei project. El e sia dunna Sonia Atlantova, medemamein artista, han transformau las aissas dallas chistas en purtaders simbolics per la pasch. Cristus e sogns dalla baselgia ortodoxa miran sin nus, instantamein ed en quietezia. Il recav dalla vendita va a spitals mobils da voluntaris ell’Ucraina.
|
|
|
NUS CAREZEIN SOGN GIUSEP
|
Gia dapi ils emprems decennis dall’existenza da nossa cuminonza ha sogn Giusep gudiu ina veneraziun speciala. Tenor la tradiziun biblica ha el procurau a moda altruistica per la protecziun ed il beinstar da sia famiglia. Aschia han anteriuras generaziuns da consoras adina puspei confidau ad el lur quitaus e fastedis per il beinstar material. Per sia fiasta dils 20 da mars ein nos voluntaris puspei envidai al survetsch divin ed al gentar ensemen cun la cuminonza dallas soras.
|
|
|
FIERA CLAUSTRALA A TURITG
|
Venderdis e sonda, ils 5 e 6 da matg 2023 mintgamai dallas 11:00 entochen las 19:00 ha liug ina fiera claustrala ella halla dalla staziun principala da Turitg. In pulit diember da cuminonzas claustralas ein presentas cun in stan. Quei tut sut il grond aunghel da Niki de Saint Phalle. Era nus dominicanas san ins entupar leu.
|
|
|
Ferton che jeu drezzel quels salids a Vus contonschan nus di per di novitads sgarscheivlas da destrucziun entras tiaratriembel ed uiara. Arva il spazi da tia tenda – aschia secloma nossa parola pigl onn 2023. Ella regorda nus che nus astgein buca mirar naven da miserias e pitgiras.
|
|
Era a Vus giavischel jeu in cor aviert en quei temps.
|
|
