|
|
|
|
Novitads dalla claustra da Glion
|
|
|
|
|
|
|
|
|
|
|
|
Cultura da pasch ella communitad
Aschia secloma nies tema digl onn 2022. Per l’elecziun dil tema havein nus s’orientau tier la fundaziun dil «Forum für Friedenskultur»en nossa Casa da Sentupada, che ha giu liug l’emprema ga igl uost 2021 sut il tetel «Ilanzer Sommer».
|
|
Igl ei stau clar per nus: Sche nus sco cuminonza prendein l’iniziativa da fundar in tal forum, lu vein nus sezzas era da sedumandar danovamein, con cunscientamein che nus vivin denter nus la pasch. Dapli tier il di da studi intern cheu.
|
|
|
|
Muort l’aulta vegliadetgna dallas soras essan nus en nies mintgadi confruntadas stediamein cun il viver ed il murir. El decuors digl onn vargau han otg soras bandunau nus. Ils 17 da december ei sora Eugenia morta nunspetgadamein en nossa casa materna ella vegliadetgna da mo 65 onns. Sia mort ha consterniu nus profundamein. In cuort riug anfleis Vus cheu.
|
|
|
Suenter Delta und Omikron - temps per sentupadas
|
|
Nus selegrein sin ina nov’entschatta, oravontut era en nossa Casa da Sentupada. Schi biaras occurrenzas e sentupadas han buca astgau ver liug. Finalmein savein nus denton cuntinuar culs „Ilanzer Klostergespräche“ – sil program stat ils 25 da mars la cantadura Corin Curschellas. Dapli informaziuns anfleis Vus cheu ni sin Veranstaltungskalender.
|
Nossa baselgia: Nus essan ledas da saver arver naven da sonda, ils 5 da mars 2022 nossa baselgia per persunas externas, quei mintgamai alla fin d’jamna, per ils suandonts survetschs divins, Sonda 17.40 uras laud dalla sera, dumengia 07.30 uras laud dalla damaun, 10.00 uras sontga messa, 17.40 uras laud dalla sera. Externas persunas portan la mascrina. Il Café Quinclas ei aunc buc’ aviarts per la publicitad. Nus engraziein per Vossa capientscha.
|
Dapi 1952 essan nus activas en Brasilia ella lavur sociala ed ella pastoraziun. Entschiet ha tut cugl accumpignament da famiglias tudestgas da fugitivs dalla secunda uiara mundiala, che vulevan baghegiar si en Brasilia ina nova existenza cul sustegn dalla Caritas. Quei ei gartegiau e las soras han priu in’ulteriura decisiun. Quei saveis Vus leger cheu.
|
|
|
Entras donaziuns a nossa procura dalla missiun savein nus sustener finanzialmein ils projects da nossas consoras. La menadra da nossa procura dalla missiun, Christine Imholz, va entschatta mars a Brasilia per saver far el liug in maletg digl engaschament dallas soras, sias conluvreras e conluvrers. Lur lavur consista principalmein en survetsch per affons, per giuventetgna e lur famiglias en las periferias dils marcaus.
|
|
Tenor veglia tradiziun ecclesiastica entscheiva la cureisma culla mesjamna dalla tschendra, uonn ils 2 da mars. Duront las proximas jamnas avon Pastgas metta l’instituziun “Katholisches Hilfswerk” il focus per l’acziun da cureisma silla protecziun dil clima. Che nus vein schau installar il 2020 indrezs da fotovoltaica sils tetgs plats dalla claustra (mira novitads dil november 2020), deliberescha buca nus da star vinavon activas en quei grau. In’ulteriura gronda investiziun ei buca planisada. Denton ei dat en casa avunda pusseivladads, nua che mintga sora sa prestar si’atgna pintga contribuziun, seigi quei “mo” cun ir entuorn precautamein culla rauba ni era enten dismetter rumien, risguardond la protecziun dil clima.
|
|
|
|
Caras lecturas, cars lecturs
|
|
Temps da cureisma, protecziun dil clima e Pastgas – tut quei en ina fladada! Las flurettas finas da primavera che laghegian bufatgamein denter las plattas da betun e crappa siado ein in’enzenna che fa curascha malgrad tut. Ei dat Pastgas ed ei dat la levada, era sche nus savein buc exactamein en tgei moda e maniera che quella vegn a succeder.
|
|
Cun quels salids da speronza giavischel jeu a Vus in bien temps da Pastgas e tut bien pil futur.
|
|
|
Sora Annemarie Müller
Piura generala dallas dominicanas da Glion
|
|
|
|
|
|
|
|
|
|
