|
|
|
|
Novitads dalla claustra da Glion
|
|
|
|
|
|
|
|
|
|
|
|
A meisa cun sogn Dumeni
Aschia secloma il tema digl onn 2021 digl uorden da sogn Dumeni, ch’ei derasaus sigl entir mund. Nus soras da Glion essan ina part da quei uorden ed aschia ei quei era nies tema. Anno 1221, pia avon 800 onns, ei nies fundatur Dumeni morts en Bologna, nua che sia fossa sesanfla. Il maletg che ha dau in impuls per il tema digl onn, ha siu origin el 13avel tschentaner.
Tgei muntada ha quei per nus soras dominicanas, - da seser alla medema meisa cun sogn Dumeni sco cun in contemporan?
Entgins patratgs da nus soras sin quella damonda anfleis Vus CHEU.
|
Igl onn da sogn Giusep - il niev uestg da Cuera - Nus soras digl Institut sogn Giusep
|
Quei ein gest treis temas, ch‘ein colligiai ensemen. Tut casualitad? Igl onn da sogn Giusep, proclamaus da papa Francestg, e l‘ordinaziun dil niev uestg da Cuera, Joseph Maria Bonnemain – ein dus eveniments, che pon sin ina moda ni l’autra forsa esser curdai a nus. Denton, che nus soras dominicanas essan ufficialmein purtadas en el register da commerci sco Institut sogn Giusep, gliez ei ina veglia historia.
Treis temas, treis interpretaziuns da nossa vart anfleis Vus CHEU.
|
Project "Forum per cultura da pasch" - Entschatta "Stad da Glion (Ilanzer Sommer)" 2021
|
Dapi 2018 luvrein nus vid quei project. Treis persunas externas dil fatg han accumpignau nus leutier: Lea Suter, Adi Blum e Beat Mazenauer. En il davos Newsletter havein nus informau sur dalla fundaziun dil « Forum per cultura da pasch » (ils 13 da november 2020). Dapi lu ei vegniu luvrau vinavon vid quei niev fundau project. Tgei ch’ei planisau questa stad, saveis Vus leger CHEU.
|
Nossa procura dallas missiuns - nus mirein anavon
|
Avon in tschentaner, cu las empremas soras ein partidas naven da Glion en la missiun en China, ei nossa procura dallas missiuns vegnida fundada. Dapi lu ei il mund semidaus fetg, ed era la noziun dil plaid missiun ella baselgia sco tier nus, ei semidada. S’engaschar en solidaritad e carezia proximala per dar vinavon nossa cardientscha cristiana ei tuttavia in grondius ideal, mo senza sustegn finanzial va ei buc. Denton buca mo las definizuns daventan novas, mobein era igl entir proceder semida. Il schaner 2021 havein nus saviu elaborar ed approbar la strategia da continuaziun per la procura dallas missiuns tochen ils 2025, ed aschia saviu actualisar l’incumbensa e dar ad ella ina nova perspectiva. Pli detagliau saveis Vus leger CHEU.
|
Nossa tgeua grotta da Lourdes
|
Cun nossa claustra si Quinclas presentein nus negin liug da pelegrinadi en fuorma usitada, denton …
Fetg damaneivel dalla claustra ha ina generaziun da soras tschaffau igl onn 1929 l’iniziativa per ina grotta da Lourdes. Il meister da construcziun, signur Lorenz Caduff da Schluein, ha survegniu l’incumbensa da nezegiar il grep natural, che sesanflava leu, per scaffir in liug da retratgadad da silenzi ed oraziun. Ina statua da Nossadunna ord arschella han ins lu tschentau en la nischa dil grep. Entuorn ils onns 80 ei quella statua da Maria vegnida restaurada da Werner Bonstingl da Malans.
Per che era persunas pli veglias damognien la fetg cuorta ascensiun, vegn montau leu el proxim temps in tschabergal.
Dapli saveis Vus leger CHEU.
|
Cara lectura, car lectur
Gest aunc cuort avon ils 19 da mars, il di da fiasta commemorativa da sogn Giusep, cumpara nies Newsletter, en il qual sogn Giusep retscheiva ina menziun particulara. Denton fa schon in’autra bia pli gronda fiasta en il calender liturgic
da saver: Pastgas.
A Vus tuts giavischel jeu da cor, il regal dalla forza pascala che possi leventar nus tuts ord ils stretgs cunfins e cunfinaziuns, che han dominau nus en ils meins passai.
Benedidas fiastas da Pastgas
|
|
|
Sora Annemarie Müller
Priura generala dallas soras dominicanas da Glion
|
|
|
|
|
|
|
|
|
|
