Nossa claustra ha buca mirs
Per la finiziun dil giubileum dad 800 onns da nies uorden ha papa Francestg plidau tier nus cun plaids edificonts. En in mund eivers sco duront il tscheiver seigi ei nies pensums special da suandar igl evangeli da Jesus Cristus fideivlamein cun plaid ed ovra. „Vus essas il sal dalla tiara e la glisch dil mund.” (Mt 5, 13–16) Quei plaid da Jesus – plidaus tier nus oz en ina societad dallas ficziuns, dil consum e dil barlot superficial – tucca nus e lai sefermar nus. Ein buca tuttas valurs daventadas relativas? Schizun la verdad vegn neu sco smincada. Nus semovin en ina schinumnada „societad liquida” (Zygmunt Baumann). Ils carstgauns enqueran puncts fixs en lur veta. Els sesentan savens sco curdai orda lur „sistem da coordinatas”, senza puncts d’orientaziun solids e stabils per lur identitat. Quei stuein nus realisar e vulein reflectar ei pli da rudien. Tgei piteschan ils carstgauns actualmein il pli fetg? Eis ei buca la pressiun sfurzada da stuer crescher, esser innovativs ed augmentar la spertadad, che vegn dictada a nus d’in patertgar capitalistic. La tema dallas consequenzas dramaticas da nies agir che porta nus effectivamein als cunfins da noss’existenza? Nus vesein il stan critic dalla natira, da nossa tiara, dalla politica, dalla scurdada dallas structuras communablas, la diminuaziun da solidaritad denter ils pievels, sco era crisas persunalas cun lur temas dil futur.
Cun quellas damondas essan nus sefatschentadas duront nossa scolaziun dils 5 da zercladur, secapescha era el context digl evangeli. Co savein nus rispunder a quei „liquid” cun enzatgei concret? Tgei ein las „bunas ovras” en tut quei distract, malsegir e da cuorta durada.
Nus stein pér all’entschatta. Il Sogn Spért vegn a stuer gidar e sclarir a nus. Siu fiug vegn a stuer vivificar nus – ensemen cun quels biars carstgauns da bunaveglia. Co savessen nus autruisa esser il sal dalla tiara e la glisch dil mund?
Sora Wilhelma Kalpers
Fenadur 2019